GREDA-ს წარმომადგენლებმა „ჯორჯიან სთილ ინჟინერინგის“ თანამედროვე საწარმო დაათვალიერეს

2026 წლის 22 აპრილს, GREDA-ს გუნდი და წევრი კომპანიების წარმომადგენლები, ასოციაციის წევრი კომპანიის შპს „ჯორჯიან სთილ ინჟინერინგის“ ქარხანას ესტუმრნენ.

ვიზიტის ფარგლებში კომპანიის წარმომადგენლებმა სტუმრებს გააცნეს „ჯორჯიან სთილ ინჟინერინგის“ განვითარების ისტორია და განხორციელებული რებრენდინგის შედეგები. აღინიშნა, რომ კომპანია, რომელიც 2002 წლიდან სამშენებლო ლითონპროდუქციით ვაჭრობდა, დღეს თანამედროვე ლითონკონსტრუქციების მწარმოებელ ქარხანად არის ჩამოყალიბებული.

საწარმოს შესაძლებლობა აქვს, აწარმოოს ლითონკონსტრუქციები როგორც სამრეწველო და სამოქალაქო მშენებლობისთვის, ასევე სხვადასხვა ტიპის ენერგეტიკული ობიექტებისთვის - ჰესების, ქარის, მზისა და ატომური სადგურებისთვის.

ვიზიტის ფარგლებში სტუმრებმა დაათვალიერეს საწარმოო სივრცეები და თანამედროვე დანადგარები, გაეცნენ ქარხნის ტექნიკურ შესაძლებლობებსა და მიმდინარე საქმიანობას. შეხვედრაზე ყურადღება გამახვილდა ადგილობრივი წარმოების მნიშვნელობაზე ენერგეტიკული ინფრასტრუქტურის განვითარებისა და ქვეყნის ენერგოდამოუკიდებლობის პროცესში.